வெள்ளப் பெருக்கு அபாயத்தை தவிர்க்க: தேசிய நதிப்படுகைகள் அதிகார சபையை நிறுவுக - மு.கா தலைவர் ஹக்கீம் பாராளுமன்றத்தில் பலமான கோரிக்கை sz

வெள்ளப் பெருக்கை தடுப்பதோடு,நாட்டிலுள்ள பிரதான நதிகளின் பாதுகாப்பு மற்றும் நீர்வள முகாமைத்துவம் தொடர்பில் உரிய நடவடிக்கைகளை மேற்கொள்வதற்கு நதிப் படுகைகளைப் பாதுகாப்பதற்கான தேசிய அதிகார சபை   அமைக்கப்பட வேண்டுமென ஸ்ரீ லங்கா முஸ்லிம் காங்கிரஸ் தலைவர் ரவூப் ஹக்கீம் பாராளுமன்றத்தில் தெரிவித்தார். 

  

வியாழக்கிழமை (27)பாராளுமன்றத்தில் நடைபெற்ற விவசாயம்,கால்நடை வளங்கள்,காணி மற்றும் நீர்ப்பாசன அமைச்சு மீதான குழுநிலை விவாதத்தில் கலந்துகொண்டு உரையாற்றியபோதே ஸ்ரீலங்கா முஸ்லிம் காங்கிரஸ் தலைவரும்,கண்டி மாவட்ட பாராளுமன்ற உறுப்பினருமான ரவூப் ஹக்கீம் இதனைக் கூறினார்.

அவர்  மேலும் தெரிவித்ததாவது,

அனர்த்த நிலைமை குறித்து நாம் அதிகமாகப் பேச வேண்டியுள்ளது. வெள்ளத்தின் காரணமாகப் பிரச்சினை இப்போது சிக்கலாகிவிட்டதுடன், விவசாயிகளுக்குப் பாரிய பாதிப்பு ஏற்பட்டிருக்கிறது. நதிப் படுகைகளைப் பாதுகாப்பதற்காக எங்களிடம் ஒரு வேலைத் திட்டம் இல்லை. ஆகையால்,நான் அதனை முன்மொழிகிறேன், நாம்  தேசிய மட்டத்தில் இந்த நதிப் படுகைகளைப் பாதுகாப்பிற்காக  தனியான ஓர் அதிகாரசபையை உருவாக்க வேண்டும்.

இல்லையெனில், இந்தப் பணிகள் பல நிறுவனங்களின் கீழ் பிரிந்திருப்பதால், இந்த நதிப் பள்ளத்தாக்குகளையும் நதிப் படுகைகளையும் பாதுகாக்கும் நடவடிக்கைக்கு யாரும் பொறுப்பாவதில்லை. ஒன்று வனப்பாதுகாப்புத் திணைக்களம், அல்லது வனவிலங்குத் திணைக்களம், அல்லது மகாவலி அதிகாரசபை என பல நிறுவனங்களின் கீழ் வருகின்ற இந்த, நமது புவி மேற்பரப்பில் உள்ள நதிகள் 100-க்கும் மேல் இருக்கின்றன. ஆனால் இந்த நதிப் பள்ளத்தாக்குகளில், குறிப்பாக கீழ் மட்டத்திலும் கீழ் பள்ளத்தாக்குகளிலும் இருக்கும் பிரச்சினைகளுக்குத் தீர்வாக, அதிக மக்கள் வாழும் குடியிருப்புக்களைக் கொண்ட நதிப் பள்ளத்தாக்குகளாக நாம் அடையாளம் காணும் மஹாவலி கங்கை, மல்வத்து ஓயா, மஹா ஓயா, தெதுரு ஓயா, களனி கங்கை, அத்தனகலு ஓயா, கலா ஓயா, ஜின் கங்கை, நில்வளா கங்கை, கல் ஓயா ஆகியவற்றில் குறைந்தது பத்தையாவது ஒரே நதிப் படுகை(River Basin) பாதுகாப்பு அதிகாரசபையாக நியமித்து, அவற்றைப் பற்றி ஏதேனும் நீண்டகாலத் திட்டத்தை ஏற்படுத்த முயற்சித்தால் நல்லது.

இந்த மகாவலி அதிகாரசபை குறித்து, அதன் எதிர்காலம் குறித்து நான் உங்களிடம் கேட்டேன். ஏனென்றால், அது முழுமையாக இரத்து செய்யப்படும் என்று ஒரு பேச்சு அடிபட்டது. நீங்கள் சொன்னீர்கள், சட்ட நடவடிக்கைகள் மற்றும் பல வழக்குகள் நிலுவையில் உள்ளதால், அது அப்படி இரத்து செய்யப்படப் போவதில்லை, நாங்கள் சிறிது காலம் அவற்றை நடத்துகிறோம். 

ஏனென்றால், அப்படி இரத்து செய்யப் போனால், ஒரு பெரிய பிரச்சனை எழும். பல அரசாங்கங்கள் அவ்வப்போது தங்கள் ஆதரவாளர்களுக்குச் சலுகைகள் வழங்கின என்பதை நான் ஒப்புக்கொள்கிறேன். ஆனால், இதன் மூலம் அப்பாவி விவசாயிக்கு அதிக பலன் கிடைத்ததா என்று கேட்டால், அவ்வளவு பலன் கிடைக்கவில்லை.

ஆனால் இந்த நதிப் பள்ளத்தாக்குகள், குறிப்பாக நதிப் படுகைகளின் பாதுகாப்பு குறித்து ஒரு தேசிய வேலைத்திட்டம் தேவை. ஏனென்றால், அது குடிநீருக்கும் தேவை, அதேபோல நீர்ப்பாசன நீருக்கும் அந்தப் பிரச்சினை இருக்கிறது. அதனால், இவை அனைத்தையும் பாதுகாப்பதற்காக ஒரு நடவடிக்கைக்குள் நாம் இறங்க வேண்டும் என்று நான் கோருகிறேன்.

இந்த முறை பட்ஜெட்டில் கீழ் மல்வத்து ஓயா திட்டத்திற்கு சுமார் 5,000 மில்லியன் ரூபாய் ஒதுக்கப்பட்டிருப்பதாக மட்டுமே குறிப்பிடப்பட்டுள்ளது. அதேபோல, கும்புக்கன் ஓயா மற்றும் இன்னொரு திட்டத்திற்கு வெளிநாட்டு உதவி பெறுவதற்காக முயற்சிக்கிறோம் என்று ஒரு குறிப்பு இருக்கிறது, வேறு நடவடிக்கை பற்றி எதுவும் சொல்லப்படவில்லை.

ஆனால் கடந்த முறை கும்புக்கன் ஓயா திட்டத்தைத் தொடங்கப்படும் என்று ஒரு வாக்குறுதி கொடுக்கப்பட்டது. ஆனால் இப்போது கும்புக்கன் ஓயாவுக்கு என்ன ஆகிறது என்பது குறித்து இப்போது எந்தப் பேச்சும் இல்லை.

ஆனால், நேற்று முன்தினமும் நான் பேசியது போல, கும்புக்கன் ஓயாவுக்கு கீழே உள்ள மற்றொரு வேலைத் திட்டம் தான் ஹெட ஓயா திட்டம். இந்த ஹெட ஓயா திட்டம் குறித்தும் ஒரு பெரிய பிரச்சினை இருக்கிறது, அது செயல்படுத்தப்பட வேண்டும் என்று. அது குறித்து சாத்தியக்கூறு அறிக்கைகள் தயாரிக்கப்பட்டிருந்தாலும், அதனால் குறிப்பாக குடிநீர் வழங்குவதற்காக கிழக்கு மாகாணத்தில் குறிப்பாகத் தேவைப்படும் நல்ல நீர்ப்பாசன நீர் மட்டுமல்ல, யான் ஓயா திட்டம், அதேபோல முந்தெனியாறு மற்றும் அதோடு ஹெட ஓயா இந்த மூன்றுமே குறிப்பாக கிழக்கு மாகாணத்தில் இப்போது சுற்றுலாப் பயணிகள் அதிகமாக வரும் பிரதேசங்களான குச்சவெளி மற்றும் அதனைச் சுற்றியுள்ள திருகோணமலை மாவட்டத்தின் கடற்கரைப் பிரதேசம். ஹோட்டல்கள் பல கட்டப்பட்டிருக்கின்றன.

ஆனால் அங்கே தண்ணீர் இல்லை, குடிநீரும் இல்லை. அதற்காக யான் ஓயா திட்டத்தை சரியாகச் செயல்படுத்தினால், அதை நாம் வெற்றிகரமாகச் செய்ய முடியும். அது ஒரு திட்டம்.

இப்போது முந்தெனியாறு குறித்து ஒரு குறிப்பு வந்துள்ளது. ஆனால் முந்தெனியாறு திட்டத்தில் றூகம்,கித்துல் குளங்கள்  இரண்டையும் சேர்த்து ஒரு பெரிய குள அமைப்பை உருவாக்க ஒரு திட்டம் இருக்கிறது. ஆனால் அந்தத் திட்டத்தைச் செயல்படுத்தத் தேவையான பணம் இல்லாத ஒரு நிலைமையைத் தான் நாம் பார்க்கிறோம் என்று ஒரு குறிப்பு இருக்கிறது.

 ஒவ்வொரு வரவுசெலவுத் திட்டத்திலும் எப்போதும் முந்தெனியாறு பற்றி குறிப்பிடுகிறார்கள். ஆனால் எதுவும் நடக்கவில்லை. கும்புக்கன் ஓயா பற்றி குறிப்பிடுகிறார்கள், எதுவும் நடக்கவில்லை. ஹெட ஓயா பற்றி ஒரு குறிப்பும் இல்லை. ஹெட ஓயா, முந்தெனியாறு மற்றும் யான் ஓயா - இவை கிழக்கு மாகாணத்திற்குத் தேவையான இந்த நீர்ப்பாசனத் திட்டங்கள் மட்டுமல்ல, குடிநீர் குறித்து குறிப்பாக, இப்போது நாம் தொடர்ச்சியாக நமது சுற்றுலாப் பயணிகளின் வருகையை அதிகரிக்க ஹோட்டல்களைக் கட்ட முயற்சிக்கிறோம்.

 இப்போது நிறைய ஹோட்டல்கள் கட்டப்பட்டுள்ளன. ஆனால் ஹோட்டல்களுக்குக் குடிநீருக்காக அவர்கள் மாற்று வழிகளைத் தான் தேட வேண்டியிருக்கிறது. எனவே, இந்த மூன்று திட்டங்கள் குறித்தும் உங்கள் அமைச்சின் கவனம் செலுத்தப்பட வேண்டும் என்று நான் கோருகிறேன்.

அத்தோடு, மற்றொரு முக்கியமான திட்டம் என்னவென்றால், ஒரு சிறிய குறிப்பு வந்துள்ளது, ஜின் நில்வளா குறித்து ஒரு குறிப்பு வந்துள்ளது.

ஆனால் ,குறிப்பாக இப்போது இந்த மழை வீழ்ச்சி  அதிகமான காலத்தில், ஜின், நில்வளா கங்கைளின் வெள்ளம் அல்லது அந்த நதிப் பள்ளத்தாக்குகளில் ஏற்படும் சேதங்கள், பயிர்ச் சேதங்கள் குறித்து நாம் இப்போது பேச வேண்டியிருக்கிறது. ஆனால் இதில் வீணாகும் தண்ணீர், அதாவது கடலில் கலக்கும் தண்ணீரை நாம் திசைமாற்ற வேண்டுமானால், ஜின் , நில்வளா திசைதிருப்பல் திட்டத்தை நாம் செயல்படுத்த வேண்டும்.

ஆனால், அதைப் பற்றி எந்தக் குறிப்பும் இல்லை. ஆனாலும் ஹம்பந்தோட்டை மாவட்டத்திற்கு குடிநீர் வழங்கப்பட வேண்டும் என்று பேசுகிறார்கள். எங்கிருந்து குடிநீரைப் பெறுவது? அங்கே இருக்கும் குளங்கள் மூலம் மட்டுமே இதைச் செய்ய முடியும் என்பது ஒரு மாயை மட்டுமே. 

ஆனால் ஜின், நில்வளா திசைதிருப்பல் திட்டம் குறித்து இதற்கு முன் பெரிய குற்றச்சாட்டு இருந்தது. அங்கே 4,000 மில்லியன் ரூபாய் பணம் ஒதுக்கப்பட்டிருந்தாலும், பணம் யாரோ எங்கேயோ இல்லாமல் போய்விட்டது, அல்லது அதை இப்போது கண்டுபிடிக்கவும் இல்லை என்று சொன்னார்கள்.

அது குறித்து ஒரு பெரிய மோசடி நடந்தது என்று பேசப்படுகிறது. அந்த மோசடிகள் குறித்து இப்போது எந்தப் பேச்சும் இல்லை. ஆனால் ஜின் நில்வலா திசைதிருப்பல் திட்டம் குறித்து ஏதேனும் ஒரு நடவடிக்கை எடுக்கப்பட வேண்டும் என்று நான் எதிர்பார்க்கிறேன்.

ஏனென்றால், வெறுமனே 2040-க்குள் ஹம்பாந்தோட்டை மாவட்டத்திற்கு நமக்கு 9,000 கியூபிக் மீட்டர்கள் தேவை என்று சொன்னால் மட்டும் போதாது. ஆனால் இதற்கு நாம் வழிமுறைகளைக் கண்டுபிடிக்க வேண்டும். தேடிப் பார்த்தால் இருக்கும் ஒரே வழி இதுதான்.

அத்தோடு, குறிப்பாக ஒரு விடயம் என்னவென்றால், இப்போது நாம் எப்போதும் வெள்ளத்தைக் கட்டுப்படுத்துவது பற்றிக் கூறும்போது, நேற்று முன்தினமும் நான் பேசினேன், இந்த  நில மீட்பு மற்றும் அபிவிருத்தி கூட்டுத்தாபனம் (SLLRDC )தான் விசேஷ அறிவுள்ள நிறுவனம். அந்த நிறுவனத்திற்கு இந்த வரவு செலவுத் திட்ட உரையில் ஜனாதிபதி அவர்கள் 250 மில்லியன் ரூபாய் ஒதுக்கப்பட்டிருப்பதாகக் குறிப்பிட்டார்.

இந்த 250 மில்லியன் ரூபாய்களைக் கொண்டு கொழும்பு, கம்பஹா, காலி, அம்பாறை, மன்னார், புத்தளம் போன்ற நகரங்களில் இருக்கும் வெள்ளப் பாதிப்பைக் கட்டுப்படுத்துவதற்காகச் சாத்தியக்கூறு அறிக்கைகள் தயாரிக்கப்படுகின்றன என அறிகிறேன் .

ஏற்கனவே பல சாத்தியக்கூறு அறிக்கைகள் தயாரிக்கப்பட்டிருந்தன. இது மேலும் 250 மில்லியன் ரூபாய் வழங்கப்பட்டிருக்கிறது இதைச் செய்ய. இது நாம் மத்திய கால வரவு செலவுத் திட்ட கட்டமைப்பின் உள்ளே இதை வழங்குகிறோம் என்று இருக்கிறது. ஒரு மத்திய கால வேலைத்திட்டமாக இதைப்பற்றி நான் அமைச்சரிடம் கோருகிறேன்.

அமைச்சர்பிமல் ரத்நாயக்கவின் கீழுள்ள நில மீள் நிரப்பு  கூட்டுத்தாபனம் மற்றும் நகர அபிவிருத்தி அதிகாரசபையுடன் (UDA) சேர்ந்து, அமைச்சரின் தலைமையில் நிறுவனத் தலைவர்களையும் அழைத்து, இந்த வெள்ளக் கட்டுப்பாடு குறித்து, இந்த மக்கள் நெருக்கடிமிக்க நகர பிரதேசங்களில் ஏற்படும் இந்த வெள்ளக் கட்டுப்பாட்டிற்கு எடுக்க வேண்டிய நடவடிக்கைகள் குறித்தும், இந்த 250 மில்லியன் ரூபாயைப் பயன்படுத்தி அதற்குத் தேவையான சாத்தியக்கூறு அறிக்கைகளைத் தயாரித்து, நடவடிக்கை எடுங்கள்.

குறிப்பாக இப்போது அம்பாறை மாவட்டத்தில்  இது ஒரு பாரிய பிரச்சினை; மட்டக்களப்பு மாவட்டத்திலும் பெரிய பிரதேசங்கள் இப்போது வெள்ளத்தில் மூழ்கியுள்ளன. 

இவற்றுக்கான எல்லாக் காரணிகளையும் நாம் ஆராய்ந்து, தேவையான வடிகால் அமைப்புகளை உருவாக்கி,  கடலுடன் கலக்கும் ஆற்றுவாய்களை சீரமைக்க வேண்டும்.

அதனால்,  நாம் மணலை அகற்றி விட்டு, தண்ணீரை  கடலுக்குச்  விரயமாகச் செல்லவதை தவிர்க்கும்  செயல்பாட்டை நாம் நடைமுறைப்படுத்துவதற்கு சாத்தியக்கூறு அறிக்கை தேவை. இவற்றைப் பல இடங்களில் பேசினாலும், இவை நடைமுறைக்கு வரப்போவதில்லை.

அத்தோடு, மீண்டும் ஒரு முறை நான் வலியுறுத்துகிறேன். இந்த நதிப் படுகை பாதுகாப்பு அதிகாரசபை என்னும் தேசிய நிறுவனத்தை நிறுவி, இந்த நாட்டில் இருக்கும் நதிகளைப் பாதுகாப்பதற்காக, அவற்றை குடிநீர், நீர்ப்பாசன நீர் போன்ற தேவைகளுக்காக மக்கள் நிரந்தரமாகப் பயன்படுத்தும் வகையில் இது குறித்து ஒரு திட்டத்தை உருவாக்குங்கள் என்று கேட்டுக்கொள்கின்றேன் என்றார்.

(தொகுப்பு: எம்.என்.எம்.யஸீர் அறபாத், BA , ஓட்டமாவடி.)