மதிப்பிற்குரிய அஷ்ஷெய்க் அரூஸ் (கபூரி) அவர்களின் மறைவு மீள முடியாத கவலையையும் வேதனையையும் ஏற்படுத்தியிருக்கிறது !

பொது வாழ்வில் எல்லோருடனும் சிரித்த முகத்துடன் மிக அன்பாகவும், பண்பாகவும், பழகி வந்த அஷ்ஷெய்க் அரூஸ் (கபூரி) அவர்கள்  சமுக பணியில் ஓயாது தன்னை ஈடுபடுத்திக்கொண்டவர். தனது நற்குணங்களினால் அனைவரையும் வசீகரிக்கும் ஆற்றலையும் கொண்டிருந்தார்.

புத்தளம் - மதுரங்குளி - கனமூலையைச் சேர்ந்த அஷ்ஷெய்க் அரூஸ் (கபூரி) அவர்கள் கடந்த சில தினங்களாக சுகயீனமுற்றிருந்த நிலையில் நேற்று (05) ஞாயிற்றுக்கிழமை இறையடி சேர்ந்துவிட்டார்கள் (இன்னாலில்லாஹி வஇன்னா  இலைஹி ராஜிவூன்) என்ற செய்தி காதுக்கு எட்டியதும் எமக்கு பேரிடியாக இருந்தது. மீள முடியாத கவலையையும் வேதனையையும் ஏற்படுத்தியிருக்கிறது.  என மதுரங்குளி ஊடகவலையமைப்பு தன்னுடைய இரங்கல் செய்தியை பதிவு செய்கிறது.

எனினும் நாம் எல்லோரும் யதார்த்தத்தை உணர்ந்து இறை நாட்டத்தை பொருந்திக் கொண்டு, அன்னாருக்காக துஆச் செய்வதைத் தவிர வேறெந்த காரியத்தையும் செய்யமுடியாத நிலையிலிருக்கிறோம். 

கனமூலை லத்தீப் மாவத்தை ஆயிஸா மஸ்ஜித்தின் இமாமாக 25 வருடமாக பணிபுரிந்தவரும், கனமூலை முஸ்லிம் மகா வித்தியாலயத்தில் பணியாற்றி வந்தவருமான அஷ்ஷெய்க் அரூஸ் கபூரி அவர்களின் மறைவு பேரிழப்பாகும்.

பணிவு, பண்பாடு, அடக்கம், அர்ப்பணிப்பு, நேர்மை, வாய்மை, துணிச்சல், ஆற்றல் என்று அனைத்து பண்புகளையும் தன்னகத்தே கொண்டிருந்த ஒரு சிறந்த உலமாவாக இவர் சமூகத்தில் அடையாளம் காணப்பட்டிருந்தார். இத்தகைய சிறந்த பண்புகளைக் கொண்ட உலமா அவர்கள் இஸ்லாமிய அழைப்பில் ஈடுபட்டு வந்ததோடு மேலதிகமாக சமூக சேவைகளில் அதிக ஈடுபாடு காட்டி வந்தார். சமூக சேவை என்பது தனது கூடப்பிறந்த குணவியல்பு போன்று வரிந்து கட்டிக்கொண்டு, செயற்பட்டு வந்ததை நாம் கண்டோம்.

அவரது திடீர் மறைவு சமூகத்திற்கும் ஊருக்கும் ஈடுசெய்ய முடியாத பேரிழப்பாகும். அவர் இம்மண்ணுக்கு விடை கொடுத்தாலும் அவரது சேவைகள் என்றும் நினைவுகூரப்படும் என்பதில் சந்தேகமில்லை.

அன்னாரின் மறைவினால் துயருற்றிருக்கும் குடும்பத்தினருக்கும், உறவுகளுக்கும் எல்லாம் வல்ல அல்லாஹ் அழகிய பொறுமையினைக் கொடுப்பதுடன் அன்னாரின் சகல பாவங்களையும் மன்னித்து உயர்தரமான ஜன்னதுல் பிர்தௌஸ் என்ற சுவனத்தை வழங்குவானாக! (ஆமீன்) என்று பிராத்திக்கிறோம்.

மதுரங்குளி மீடியா