புத்தளம் இந்து மத்திய கல்லூரியில் தரம் ஐந்து புலமைப்பரிசில் சித்தியடைந்த மாணவர்களைக் கௌரவிக்கும் நிகழ்வு.

எம்.யூ.எம்.சனூன்

புத்தளம் இந்து மத்திய கல்லூரியில், தரம் ஐந்து புலமைப்பரிசில் பரீட்சையில் சித்தியடைந்த மாணவர்களைக் கௌரவிக்கும் சிறப்பு நிகழ்வு, வியாழக்கிழமை (08) “கல்விக்கு கரம் கொடுப்போம்” என்ற தொனிப்பொருளின் கீழ் சிறப்பாக நடைபெற்றது.

மாணவர்களின் கல்வி அடைவுகளைப் பாராட்டுவதுடன், அவர்களின் எதிர்காலக் கல்விப் பயணத்திற்கு தேவையான ஊக்கத்தையும் நம்பிக்கையையும் வழங்கும் நோக்கில் இந்தக் கௌரவிப்பு நிகழ்வு ஏற்பாடு செய்யப்பட்டிருந்தது.

புத்தளம் இந்து மத்திய கல்லூரியின் அதிபர் பீ.ஆர். தம்பித்துரை மற்றும் தரம் ஐந்து வகுப்பு ஆசிரியை எம்.எச். ஹபியா ஆகியோரின் தலைமையில் இந்நிகழ்வு நடைபெற்றது.

யாழ்ப்பாண மாவட்டத்தைச் சேர்ந்த சர்வதேச மனித உரிமைகள் உலகளாவிய பணியின் அங்கத்தவர்களினால் இந்நிகழ்வு ஏற்பாடு செய்யப்பட்டிருந்ததுடன், நிகழ்வுக்கான ஒருங்கிணைப்பு மற்றும் உதவிகளை மபாஸ் சிராஜ் வழங்கியிருந்தார்.

இந்நிகழ்வின் பிரதம அதிதிகளாக, சர்வதேச மனித உரிமைகள் உலகளாவிய பணியின் யாழ்ப்பாண மாவட்டப் பணிப்பாளரும், சமாதானத் தூதுவருமான அப்துல் பரீத் ஆரிப், யாழ். மாவட்ட ஊடகப் பணிப்பாளர் கந்தசாமி கருணாகரன், ஊடகவியலாளர் ஏ.டபில்யூ.எம். பஸ்லான், மற்றும் பாஸ்டர் டபில்யூ.ஏ. சுமித் குமார ஆகியோர் கலந்துகொண்டு சிறப்பித்தனர்.

இந்நிகழ்வில், தரம் ஐந்து புலமைப்பரிசில் பரீட்சையில் சித்தியடைந்த மாணவர்களின் கல்வி அடைவுகளையும் திறமைகளையும் பாராட்டும் வகையில் அவர்களுக்கு பதக்கங்கள் மற்றும் சான்றிதழ்கள் வழங்கப்பட்டதுடன், இலவசமாகப் புத்தகப் பைகளும் வழங்கி வைக்கப்பட்டன.

மாணவர்களின் கல்வி சாதனைகளை அங்கீகரித்து அவர்களை மேலும் உயர்ந்த இலக்குகளை நோக்கி பயணிக்கச் செய்வதுடன், கல்வியில் அவர்களுக்கு தொடர்ச்சியான ஊக்கத்தையும் ஆதரவையும் வழங்கும் வகையில் இந்தக் கௌரவிப்பு நிகழ்வு அமைந்தது.

இதன்போது, பாடசாலை மாணவர்களினால் ஏற்பாடு செய்யப்பட்ட சிறப்பு கலை நிகழ்ச்சிகளும் மேடையேற்றப்பட்டன. மாணவர்களின் ஆக்கத்திறன், கலைத்திறமை, தன்னம்பிக்கை மற்றும் மேடை ஆற்றலை வெளிப்படுத்தும் வகையில் இக்கலை நிகழ்ச்சிகள் அமைந்திருந்தன.

அதேவேளை, புத்தளம் மாவட்டத்தைச் சேர்ந்த சர்வதேச மனித உரிமைகள் உலகளாவிய பணியின் பணிப்பாளர்கள், பிரதிப் பணிப்பாளர்கள், ஒருங்கிணைப்பாளர்கள் மற்றும் உறுப்பினர்கள் உள்ளிட்ட பலரும் இந்நிகழ்வில் கலந்துகொண்டு மாணவர்களை வாழ்த்தினர்.

கல்வி என்பது ஒரு மாணவரின் எதிர்காலத்தை மட்டுமன்றி, ஒரு சமூகத்தின் முன்னேற்றத்தையும் தீர்மானிக்கும் மிக முக்கியமான அடித்தளமாகும். அந்த வகையில், கல்வியில் சிறந்து விளங்கும் மாணவர்களை அடையாளம் கண்டு அவர்களின் சாதனைகளைப் பாராட்டுவதும், அவர்களின் எதிர்காலக் கல்விப் பயணத்திற்கு தேவையான ஊக்கத்தையும் ஆதரவையும் வழங்குவதும் சமூகத்தின் முக்கியப் பொறுப்பாகும்.

“கல்விக்கு கரம் கொடுப்போம்” என்ற உயரிய நோக்கத்தை முன்னிறுத்தி நடைபெற்ற இந்நிகழ்வு, மாணவர்களின் கல்வி சாதனைகளை கௌரவிப்பதுடன், அவர்களின் திறமைகளை வெளிக்கொண்டு வருவதற்கும், எதிர்காலத்தில் மேலும் பல வெற்றிகளைப் பெறுவதற்கான நம்பிக்கையையும் உற்சாகத்தையும் ஏற்படுத்துவதற்கும் ஒரு சிறந்த முயற்சியாக அமைந்தது.

தரம் ஐந்து புலமைப்பரிசில் பரீட்சையில் சித்தியடைந்த மாணவர்களின் வெற்றியைப் பாராட்டி நடைபெற்ற இந்தக் கௌரவிப்பு நிகழ்வு, கல்வி, மனிதநேயம் மற்றும் சமூகப் பொறுப்புணர்வை ஒன்றிணைக்கும் ஒரு அர்த்தமுள்ள நிகழ்வாக சிறப்பாக நிறைவடைந்தது.