🔴 மத்திய கிழக்கு நிலைமை குறித்து வெளிநாட்டு வேலைவாய்ப்பு நிறுவனங்களின் சங்கம் அறிக்கை..!

உரிமம் பெற்ற வெளிநாட்டு வேலைவாய்ப்பு நிறுவனங்களின் சங்கம் (ALFEA) மத்திய கிழக்கில் நிலவி வரும் தற்போதைய சூழ்நிலை தொடர்பாக ஊடக அறிக்கை ஒன்றை வெளியிட்டுள்ளது.

1985 ஆம் ஆண்டின் இலங்கை வெளிநாட்டு வேலைவாய்ப்பு பணியகம் சட்டத்தின் கீழ் நிறுவப்பட்ட இச்சங்கம், வெளிநாட்டு வேலைவாய்ப்பு துறையின் ஒரே பிரதிநிதி அமைப்பாக இருந்து, இவ்வறிக்கையை வெளியிட்டுள்ளது.

அறிக்கையில், இலங்கையர்களின் பாதுகாப்பு, நலன் மற்றும் தொழில் நிலைத்தன்மையை உறுதி செய்ய மத்திய கிழக்கு நாடுகளின் அரசுகளுக்கும் தலைவர்களுக்கும் நன்றியை தெரிவித்துள்ளது. தற்போது சுமார் 11 இலட்சம் இலங்கை தொழிலாளர்கள் மத்திய கிழக்கு உள்ளிட்ட பல நாடுகளில் பணியாற்றி வருகின்றனர் என குறிப்பிடப்பட்டுள்ளது.

மேலும், இலங்கையின் வெளிநாட்டு வருமானத்தில் முக்கிய பங்கு வகிக்கும் பணமாற்றுகளில் சுமார் 70% மத்திய கிழக்கு நாடுகளிலிருந்தே கிடைப்பதாகவும், நாட்டின் மக்கள் தொகையில் சுமார் 25% பேர் நேரடியாக அல்லது மறைமுகமாக வெளிநாட்டு வேலைவாய்ப்பு துறையை சார்ந்து வாழ்வாதாரம் நடத்துகின்றனர் எனவும் தெரிவிக்கப்பட்டுள்ளது.

இந்நிலையில், தொழிலாளர்களின் பாதுகாப்பை கருத்தில் கொண்டு, மத்திய கிழக்கு அரபு நாடுகளை இலக்கு வைத்து மேற்கொள்ளப்படும் தாக்குதல்களை உடனடியாக நிறுத்துமாறு ஈரானிடம் சங்கம் கோரிக்கை விடுத்துள்ளது.

அதேவேளை, மத்திய கிழக்கில் நிலவும் மோதல் சூழ்நிலை விரைவில் முடிவுக்கு வந்து அமைதி நிலைநிறுத்தப்படும் என இலங்கை அரசும் மக்களும் எதிர்பார்க்கின்றனர் எனவும் குறிப்பிடப்பட்டுள்ளது.

நிலைத்தன்மை ஏற்படுத்தப்பட்ட பின்னர், மத்திய கிழக்கு பொருளாதார வளர்ச்சிக்கும் இலங்கை பொருளாதார முன்னேற்றத்திற்கும் இணைந்து செயல்படத் தயாராக இருப்பதாகவும், அங்கு பணியாற்றும் இலங்கை தொழிலாளர்களுக்கு எதிர்காலத்தில் மேலும் அதிக வாய்ப்புகள் உருவாகும் என நம்பிக்கை வெளியிடப்பட்டுள்ளது.