கனமூலை கிராமத்தின் வரலாற்றில் ஒரு மகத்தான சாதனை - அஷ்ஷெய்க் எம்.ஏ.எல்.எம் பஸ்லுல் பாரிஸ் (நளீமி)

அல்ஹம்து லில்லாஹ் என்ற வார்த்தையுடன் நினைவுகூர்கிறேன் – கனமூலை தாயின் மைந்தன் ஏ.ஏ.எம் அஸாம் அவர்கள், தனது விடாமுயற்சி, தன்னம்பிக்கை, தூய்மையான இலட்சியங்களால் கனமூலை கிராமத்தின் வரலாற்றில் ஒரு மகத்தான சாதனையை பதித்துள்ளார்.

📚 தனது ஆரம்பக் கல்வி முதல் க.பொ.த சாதாரண தரம் வரை பு/கனமூலை முஸ்லிம் மகா வித்தியாலயத்தில் கற்று, புத்தளம் சாஹிரா தேசியக் கல்லூரியில் உயர்தர கற்கையை தொடர்ந்தார். அதன்பின், பட்டப்படிப்பை இலங்கை கிழக்குப் பல்கலைக்கழகத்தில் கலைத்துறையில் வெற்றிகரமாக நிறைவு செய்தார்.

தனது கல்விச் சேவையை Mercy Education வளாகத்தில்  ஆசிரியராக இணைந்ததன் மூலம் மாணவ சமூகத்திற்கு வழங்க ஆரம்பித்ததார். தற்போது பெருக்குவட்டான் அல் மின்ஹாஜ் முஸ்லிம் மகா வித்தியாலயத்தில் ஆசிரியர் பணியை சிறப்பாக ஆற்றி வருகிறார்.

அண்மையில்,  நாடளாவிய ரீதியில் நடைபெற்ற இலங்கை நிர்வாக சேவை போட்டிப் பரீட்சையில் திட்டமிடல் சேவைக்காக தேர்வு செய்யப்பட்டுள்ள செய்தி, அவரின் இடையறாத உழைப்பையும் மன உறுதியையும் எடுத்துக்காட்டுகிறது.

தனது கல்விப் பயணத்தில் பல்வேறு பொருளாதார, சமூக சவால்கள் இருந்த போதிலும் அவற்றை வெல்லும் மனதாரத்துடன் அஸாம் பயணித்த விதம் இன்றைய இளைய தலைமுறைக்கு கனதியான பாடமாக அமைக்கிறது. வசதியின்மை முன்னேற்றத்திற்கு தடையாக இருப்பதில்லை என்பதை அவர் நிரூபித்துள்ளார். கல்வியை மட்டுமல்ல ஒழுக்கத்தையும் பண்பாட்டையும் மார்க்க அடிப்படைகளையும் பேணிய முன்மாதிரி; ஒவ்வொரு மாணவனுக்கும் முன்னோடியாகத் திகழ்கிறார்.

அஸாம் போன்று நமது கிராமத்திலிருந்து மேலும் பலர் உருவாக வேண்டும் என்றால், பெற்றோர்களும் ஊர் தலைமைகளும் கல்விக்கு வழங்க வேண்டிய உரிய பங்களிப்பையும் இடத்தையும் வழங்க வேண்டும். இளைய சமுதாயம் தமது இலக்கை தெளிவாக அடையாளப்படுத்தி முயற்சிக்க வேண்டும். ஒவ்வொரு குடும்பமும் வழிகாட்ட பொறுப்பேற்ற தலைமைகளும் கல்வியை வாழ்க்கையின் அடித்தளமாகக் கருதி வளர்த்தால் மட்டுமே நம் சமூகத்தின் நிலையும் உயர்வடையும்.

அஸாமின் இவ்வடைவு வறுமையை வென்று உயரம் எட்ட முடியும் என்பதற்கான வாழும் சான்றாகும். இது கனமூலை கிராமத்தின் வரலாற்றில் ஒரு நம்பிக்கையின் விளக்காகக் கணிக்க முடியும்.

இன்னும் பல உச்சங்களை அஸாம் எட்ட வேண்டும்; எட்ட முடியும் என உறுதியாக நம்புகிறேன். 

உனக்காக அல்லாஹ்வின் அருள் வேண்டி விடைபெறுகிறேன்.

அஷ்ஷெய்க் எம்.ஏ.எல்.எம் பஸ்லுல் பாரிஸ் (நளீமி)