மத நல்லிணக்கத்திற்கு ஒரு சிறப்பான முன்னெடுப்பு.

எம்.யூ.எம்.சனூன், எம்.எச்.எம்.சியாஜ்

அகில இலங்கை ஜம்இய்யத்துல் உலமா புத்தளம் நகரக் கிளையினரால், சமூகத்தில் மதங்களுக்கிடையேயான ஒற்றுமை, பரஸ்பர மரியாதை மற்றும் நல்லுறவை வலுப்படுத்தும் உயரிய நோக்கில் ஒரு சிறப்பான நல்லிணக்க விஜயம் ஏற்பாடு செய்யப்பட்டது.

இவ்விஜயம், கொழும்பு புத்தளம் பிரதான வீதியில் அமைந்துள்ள பௌத்த மதஸ்தலமான பௌத்த மத்திய நிலையத்தில் இடம்பெற்றது. 

விஜயத்தில் கலந்து கொண்ட குழுவினர், அங்குள்ள பௌத்த மதகுருவை மரியாதையுடன் சந்தித்து, நட்புறவு மற்றும் பரஸ்பர புரிதலை வளர்க்கும் நோக்கில் கலந்துரையாடலில் ஈடுபட்டனர்.

இந்த சந்திப்பின் போது மதங்களுக்கிடையேயான பரஸ்பர மரியாதை மற்றும் புரிதல், சமூக நல்லிணக்கம் மற்றும் ஒற்றுமையின் அவசியம், பல்வேறு மதங்களைச் சேர்ந்த மக்களுக்கிடையேயான அமைதியான இணை வாழ்வு, இளைஞர்களிடையே நல்லிணக்க உணர்வை வளர்த்தல் மற்றும் எதிர்காலத்தில் இணைந்து செயல்படுவதற்கான வாய்ப்புகள் உள்ளிட்ட முக்கிய அம்சங்கள் குறித்து விரிவான கலந்துரையாடல்கள் இடம்பெற்றன.

இதன் போது, சமூகத்தில் அமைதி, சகிப்புத் தன்மை மற்றும் நல்லுறவை நிலை நிறுத்துவதில் மதத் தலைவர்களின் பங்கு மிக முக்கியமானது என்பதை இரு தரப்பினரும் வலியுறுத்தினர். 

மேலும், மனிதாபிமானம், ஒற்றுமை மற்றும் பரஸ்பர மரியாதை மேலிட வேண்டிய அவசியத்தையும் எடுத்துக்காட்டினர்.

இச்சந்திப்பு, மதங்களுக்கிடையேயான நம்பிக்கை, நட்பு மற்றும் நல்லிணக்கத்தை வலுப்படுத்திய சிறந்த முன்னுதாரணமாக அமைந்ததுடன், எதிர்காலத்தில் இத்தகைய முயற்சிகளை தொடர்ந்து முன்னெடுக்க வேண்டிய அவசியத்தையும் எடுத்துரைத்தது.